Sendhang Sani
Kawuningana bilih
sunan menika ulama ingkang saben wekdalipun tansah enget dhumateng Gusti Allah,
pakaryanipun namung ngaos, mucal ajaran agami kangge para muridipun. Gandheng
panjenengane menika tansah caket kaliyan Gusti Allah pamila sunan klebet tiyang
ingkang panyuwunanipun asring dipunpinangkani utawi dipunijabahi dening Gusti
Allah. Salah setunggalipun sunan paraga salebetipun cariyos inggih menika Sunan
Bonang.
Kacariyos Sunan
Bonang saking Jawi Wetan badhe tindak wonten padhepokanipun Sunan Muria ingkang
mapan ing Gunung Muria. Wekdal nembe dumugi tlatah Pati sampun ndungkap wanci
sholat dhuhur. Kanjeng Sunan Bonang
lajeng dhawuh dhumateng pandherekipun ingkang cacahipun wonten kalih,
supados ngupadi sumber toya kanggo wudlu. “ Ayo, Le! Ndang dhuhur sek. Merga
wis wektune sholat dhuhur. Ora kena ngulur wektu.” Dhawuhe Kanjeng Sunan Bonang
dhumateng pandherekipun. “ Nggih, Rama. Lha wudlunipun kados pundi, Rama?.”
Ucap pandherekipun Kanjeng Sunan Bonang, amarga boten wonten toya kagem wudlu.
“ Iki tekenku gawanen. Goleka papan sumber banyu sing cedhak karo uwit sing
gedhe. Mengko yen rampung sholat ben bisa ngaso sisan.” Kanjeng Sunan Bonang
kaliyan ngaturaken tekenipun. “ Sendhika dhawuh, Rama.” Wangsulanipun
pandherekipun Kanjeng Sunan Bonang. Kanjeng Sunan Bonang maringaken tekenipun
utawi tongkat dhumateng pandherek kalawau kaliyan nyuwun menawi pados papan
sumber toya ingkang caket uwit ageng saengga sasampunipun sholat mangke saged
sumene/ngaso sawatawis wonten ngandhap uwit menika.
Mboten antawis
dangu pandherekipun sampun pikantuk uwit ageng saha hawanipun asrep. Ing ngriku
pandherek kalawau lajeng nancepake tekenipun Kanjeng Sunan wonten ngandha uwit
ageng. Maak jleb... sasmpunipun dipuncabut saking siti, ngedalaken toya ingkang
resik tur bening. “ Waahh seger tenan ya banyune. Banyune resik tur bening enak
nek dienggo ngobe karo adus.” Ucap satunggaling pandherek kalawau. “ iya,
banget suegere banyu iki. Aku dadi pengen kungkum wae.” Wangsulane pandherek
ingkang setunggal malih. Pandherek kalawau supe dhawuhipun Kanjeng Sunan Bonang
bilih kedah enggal-enggal matur menawi pikantuk sumber toya. Kepara nyata
pendherek kalih kalawau malah nginum tya bening kaliyan adhus kanthi suka-suka
ngantos wekdal sholat dhuhur badhe telas. Sunan Bonang mboten jenjem
penggalihipun, awit wekdal Sholat Dhuhur badhe telas dene pandherekipun dereng
matur. “ muridku mau padha ning ngendi ya, ya. Kamangka wektu sholat meh
entek.” Kanjeng Sunan Bonang kaliyan mlaku ngalor-ngidul. Pramila Sunan Bonang
sumusul saha madosi pandherekipun kekalih. Dumugi papan ngriku malah
kekalihipun sami suka-suka adus. Pirsa
kawontenan mekaten, Sunan Bonang ngendika bilih pandherekipun menika dados
bulus. “ eee... jebul awakmu ana kene. Merga awakmu ora ngugemi apa sing tak
prentahke saiki awakmu dadi bulus.” Ngendikanipun Sunan Bonang kaliyan duka.
Gusti Allah ngijabahi pangandikanipun sunan, pramila sanalika pandherekipun
salin wujud dados bulus ingkang cacahipun kalih.
Pandherek kekalih
nyumerepi badanipun sampun ewah dados bulus, mila muwun/nangis nyuwun
dipunwangsulaken wujudipun dados manungsa. Kekalihipun nyuwun pangapunten
dhumateng Sunan Bonang. “ Lhohh, kenapa iki awakku? Rama, kula nyuwun
pangapunten, kula supe, Rama. Kula luput, Rama. Rama nyuwun pangapunten
wanguslaken wujudipun kula dados manungsa malih, Rama. Nyuwun pangapunten, Rama
boten kula ambali malih.” Pandherekipun nyuwun pangapunten kanthi nangis-nangis
lan sujud. Sunan Bonang sampun paring pangapunten ananging Gusti Allah sampun
dhawahaken pesthi. Bulus kalih wau tetep wujud bulus ngantos samenika. Toya
ingkang kathah mblabar wonten ngandhap uwit ageng kalawau dados sendhang. Ing
ngriku dipun tenggani bulus cacah kalih ingkang asalipun pandherekipun Kanjeng
Sunan Bonang. “ Jane aku wis paring pangapura karo awakmu, nangis Gusti duwe
karep liya. Ya wis, aku arep mbacutake lakuku menyang Sunan Muria. Awakmu ning
kene wae nunggoni sendhang.” Piweling Kanjeng Sunan Bonang. Kanjeng Sunan
Bonang banjur nglajengaken lampahipun tumuju Gunung Muria. Kanjeng Sunan Bonang
paring nami sendhang kalawau inggih menika Sendhang Sani saking tembung nyisani
guru.
